Van't harten willkoumen

Seester is een schmuckes Dörp mank een wunnerschönes grönes Marschenland direkt an de Krückau twüschen Elmshorn un Seestermüh un rekt meist bit hin no de Elv.

 

Dor kann man veele reetgedeckte Hüser sehn un ok ganz veele Hüs mit de verklinkerten roden Steen von de Tegelee. Vör een lange Tiet gef das an Seesterauciek de „Klinkerwerke Kurzenmoor“, is ober vörbi.

 

Up dat schöne Wappen von Seester süht man een Fisch, de ut Woter springt un een Holsteener Perd, war trennt dörch de Linie von’n Diek.

 

De Lüht int vörige Johrhunnert hebt levt von de Landwirtschaft un de Fischeree.

Hüttodogs goht se jüm ehrn Beruf na in Elmshorn, Uetersen oder Hamborg.

 

Wenn man mol no Seester kummt un Pause mokt, denn hört man de Vogels jümmer Leed singen un de Kuckuck röpt un dat Veeh grost gemütlich an’n Diek un op de Wischen.

Dor is de Welt noch in Ordnung.

 

Seester ist öber 800 Johr old, de erste Urkund ist von 1141.

Domols wörn Siedlers ut Friesland un Holland holt. De harn Erfohrung mit den Diekbau, Entwässerung un Schlüsen. So wörn de Menschen seker vör de groten Floten von de Elv. Siet 1428 gift dat de schöne St. Johannes-Kirch. Dor find man de ölste Kanzel un den Barock-Altar von den ganzen Kreis Pinnbarg. De Opferstock mit Lazarusfigur is von 1613.

 

Rund üm de Kirch is dat Pastorat, de Kinnergorn, de Grundschol, Turnhalle, Sportplatz, Gemeinderüme, Füerwehrhus und ok noch den Kirchensool. Dor kann man Sündag-nomiddags in Sommer Kaffee drinken. Poor Frauns ut Seester hebt sik tosomen funnen un dat lütte Cafe in Gang bröcht. De Koken sünd sülben backt.

Nu kann man ok wedder inkehren in dat Restaurant „Fischerkate“ an Seesteraudiek, ober bloss Wochenend.

 

Wenn man denn wieder an’n Diek lank föhrt, denn kummt man an de lüttste Fähr von Dütschland. Dat geit mit een handbetriebenen Kohn öber de Krückau von Seesteraudiek no Krohnsnest.

 

Un denn gift dat nu bald dat neue Dörpsgemeenschaftshus. Dat schall ton Harvs fertig warn. Dat is för Veranstaltungen un as Sitzungsraum dacht. Mit Stolz kun Börgermeister Claus Hell mit Nohberslüd un Handwerkers dat Richtfest fiern.

 

Ober dat Vereensleben kummt ok nicht o kort. Dor ward sungen mit de „Seester Liedertafel“. Dat givt de Sportvereen tosomen mit Seestermüh „TSV Seestermüher Marsch“. Football het natürlich Priorität.

 

Jedenfalls is Seester een Beseuk wert. Man kann entspannen un Plattdütsch ward ok noch schnackt.

 

Gerda Mühlich, Seester
im Mai 2014

 


NDR Schleswig-Holstein Topographie: Seester, 2009 (Plattdüütsch)